685 690 695 700 705 710 715 720

Non point pour peur qu'elle avoit de mourir, Car ce mal peult par soy seule encourir. Mais trop craignant le martyre d'aymer, L'estimant plus que le sien estre amer. Et mesmement cognoissant sa nature / De tant hideuse, & tant laide figure, Que si d'amours elle estoit animee, Jamais de nul ne pourroit estre aymee. Ainsi n'ayant remede, periroit, Et de ce mal jamais ne gueriroit. Ò folz mortelz, si Mort doibt Amour craindre, Laquelle peult nostre nature estaindre, Comment au preis osons nous en tout lieu Si priveement acointer ce grand Dieu?     Mort voyant donc son dard n'avoir puissance A l'immortel Amour faire nuysance, De grand effroy, de rage, & de despit, Au fondz de l'eau honteuse se guerpit, Ou de nager, & fuyr ne cessa Jusques à tant qu'à Modon traversa. Au port duquel l'Otomane assemblee Estoit surgye. [Adonc] Mort à l'emblee Pour descharger son crevecueur hydeux Vous meit à fons Galeres vingt & deux. Peu s'en falut, que celle ou Barberousse Fut embarqué, n'endura la secousse. Voila comment son despit desgorgea, Puis là print terre, & viste deslogea.     Amour tandis qui par la Mer voloit Par ca, par la de tous costez alloit, Fort courroussé qu'il ne la peult trouver Pour ses effortz encontre elle esprouver. Quand il l'eut bien cerchee en toutes pars, Il s'en va droict à ces grandz ventz espars, / Ou peu s'en fault que sur eux ne descoche, En leur disant vilenie, & reproche. Les ventz tremblans de peur se humilierent: Et du passé mercy luy supplierent: Eulx excusans sur le commandement De cil qui a sur eulx gouvernement.