885 890 895 900 905 910 915 920

Nous donc suyvantz la terre d'Achaïe, Mesme Moree, autrement Laconie, Venons surgir en l'isle de Servy. Isle qui n'a pas ce nom deservy: Car nul Sesbi n'y a point habité, Mais bien des ratz une grand' quantité Par les buissons, ou noz chiens les chasserent, Et là le temps maintz mariniers passerent / A la lueur de la Lune plaisante, Jusques à tant que l'Aurore luysante Vint annoncer Phoebus prest à sortir, Admonestant Comites de partir: Desquelz chascun aux forsaires commande, Mettre soudain galeres à la bande: Et au dedans les esquifz retirer: Puis faire voile, & la voile tirer De Malvoysie, en Grec dicte aultrefois Monembassia, c'est à dire en Francoys, Un seul acces, pource que leans droict Vous n'y entrez que par un seul endroict. Là fut trouvé, selon aucun auteur, Le premier plant de la bonne liqueur, Qui du lieu print le nom de malvoysie, Et fut porté au Royaume Candie, Crete lors dict, habité de cent villes, A Juppiter subjectes, & serviles. Sans prendre port à ce lieu fort ancien, Modernement rendu Venicien, Prenons le vent, de peur qu'il ne se change, Et advansons oultre le cap sainct Ange, Que l[']on disoit jadis le promontoire De Malea: ou toute la nuict noire Nous navigons jusques au poinct du jour, Que nous entrons en un fascheux sejour, D'un port qu'estoit appellé Porteboute, Ou sejourna dix jours l'armee toute, Par un Siroc qui vint à l'opposite,/ Nous contraignant faire là nostre giste: Jusques à tant qu'un Ponant gracieux, Rompit l'esfort du vent audacieux