925 930 935 940 945 950 955 960

Venant expres pour nous lever le siege, Et de nager donner le privilege, Moderement souspirant parmy l'aer, Pour nous conduire ou desirons aller. Soubz sa faveur nous entrons aux campaignes De la Mer calme, & laissons ces montaignes De Porteboute, esquelles fut un temple De Juppiter Epidaure tresample, Ou Apollo tout ainsi qu'en Delphos Donnoit oracle, & respondoit aux folz Les cas futurs, curieux de scavoir, Dont le seul Dieu a notice, & povoir.     Ja commencons la terre d'Achaïe A delaisser, & voir la Romanie. Oultre le gouffre, à Corinthe qui va Respondre à l'autre à Patras, qui rive a. Naples voyons, grand port, ou l'equipage De tous les Grecz, utile au navigage, Souloit jadis demourer en repos, Pour estre prest quand viendroit à propos. Bien nous sembla du lieu forte la marque, Inaccessible à nef, galere, ou barque. Et en ce poinct à l'oeil la conduisant Par un temps calme, & soleil reluisant Gaignons pais, tant que nous sommes mis En l'Egina, isle pres Salamis: / Ou fut desfaict par les Atheniens Xerces ayant sept centz mil' Persiens: Par la conduicte, & invincible arroy Du tresvaillant Themistocles leur roy. L'Egina fut superbe Athenienne, Et de present pauvre Venicienne. Ayant changé sa premiere puissance Au dernier faix de serve obeissance. L'horreur en moy, & la pitié domine, Voyant à l'oeil celle triste ruyne: Hors de laquelle au matin nous partons, Et du chemin un peu nous escartons, Pour prendre egade aux salines prochaines De Megara, ou sont claires fontaines,