965 970 975 980 985 990 995 1000

Qui leur doulceur meslent en l'onde amere. Chascun de sel fournit lors sa galere: Et sans arrest gaignons tousjours avant, Voyant maint lieu, & mainte isle souvent Estrange à nous, & de nom incongneue. Eleüsis à noz yeulx est venue Sans la congnoistre, ou Ceres, & Pallas Eurent un temple, auquel n'estoient pas las Sacrifier autrefois les Argives, Aux pourtraictz mortz de leurs deitez vives. Deux jours, deux nuictz, sans prendre port, ou plage, Ayans le vent propice au navigage Nous emplions, tant qu'avons repos euz En terre Attique, au port de Pyreüs: Porteleon nommé par les modernes. / L'excellent port de la cité d'Athenes, Mere, & fontaine aux lettres liberales: Ou florissoient les loix philosophales, Qui par Draco bien escriptes au long Furent au peuple, en apres par Solon Veues au long, & mieulx amplifiees: Puis peu à peu au monde publiees. Dont nous humains leur sommes tous debteurs, Qu'ilz ont esté, non des loix inventeurs Tant seulement, mais aussi des usages D'huilles, de vins, de semer labourages, Par l'industrie ague, & singuliere De Triptoleme, & Pallas, qui premiere Nomma la ville Athina, qui reserve Encor ce nom, signifiant Minerve. Athenes serve, à present mise en friche, Fut tant d'honneur, & de faconde riche, Que dicte estoit à bon droit fleur du monde: Mais maintenant elle est la plus immonde, La plus abjecte, asservie, & foulée Qui soit en terre, & la plus desolée. Ses bastimens qui furent excellens, Theatres grands, ou estoyent vigilans Au bien public les Areopagites, Sont ruïnez en maisons bien petites: