1485 1490 1495 1500 1505 1510 1515 1520

Et occuper le siege imperial De cueur felon, cruel, & desloyal Fera soubdain le reste mettre à mort: Sans de son sang avoir aucun remort. Ò loy perverse! ò tyrannie dure! Quand cruaulté tant execrable dure! Que la grand fain* de regner sur l'or cher          O: faim N'a point d'horreur de devorer sa cher!     Quatorze jours du lieu de Magnesie Nous chevauchons par la mineur Asie: Tant qu'arrivons à la grande cité. Mais si voulez que vous soit recité Du traictement, de la facon de vivre Qu'il nous failloit durant la voye suyvre: Vous jugerez que de France opulente Nul ne congnoist la richesse excellente, Les grands tresors, les delectations, Qui n'a point veu estranges nations. Durant vingt jours tout ainsi qu'à la guerre, Tousjours vestu je couchois sur la terre. Car de trouver couches molles, & belles, Il n'en est point en ce lieu de nouvelles. Vivres aussi frians, & savorables, Là nous estoyent autant peu recouvrables./ Bien que de soy le païs soit fertille, Et abondant de toute chose utile: Mais le peuple est si pauvre, & mechanique, Tant oppressé de tyrannie inique, Qu'il n'a povoir les beaux champs cultiver: Ny se loger à peine pour l'yver, Leurs maisons sont basses, à simple estage Ou vous verrez en un mesme mesnage Souvent le Turc, & le Grec habiter: Chascun sa loy sans contraincte imiter. Si que j'ay veu maintes femmes Grecquesques Ayans maris subjectz aux lois Turquesques. L'un Machomet par foy recongnoissant: L'autre adorant Jesuschrist tout puissant. Chose qui semble estre non moins estrange Que veoir ensemble un Dyable avec un Ange.