125 130 135 140 145 150 155 160

Nous costoyans doncques la Barbarie, Passasmes pres de la Panthelerie, Isle qui est des Chrestiens habitee. Puis Lampedouse, isle deshabitee. Du mesme vent qui en Mer nous exalte, Sommes conduictz entre Suile, & Malthe: Ou sont manans Rhodiens Chevaliers De nostre foy columnes, & piliers: Depuis le temps que les Turcs leur osterent Rhodes par force, & d'eux la conquesterent. Las quand je vey l'aultre terre fertile, La tresriche isle, royaume de Sicile Je ne me peuz tenir de dueil, & d'ire Dedans mon cueur de trahyson mauldire: / Par laquelle a tant de fois esté France Mise en danger, & non deue souffrance.     Saches (amye) aultrefoys que par guerre Les preux Francoys conquirent celle terre: Mais trahyson qui procede d'envie La leur fit perdre avec leur propre vie: Car en un jour tous furent à mort mis, Secretement par trahystres ennemis: Qui sont encor leurs successeurs infames Du dueil qu'en ont en memoire les femmes.     Suyvant propos les vents qui lors regnerent Mestral, Ponant, tant à poinct nous menerent Par les endroictz ou fut nostre entreprise Qu'eusmes entrée au goufre de Venise. Au grand danger des prochains ennemis Qui leur armée à Messine avoyent mis. Et au danger du goufre spatieux Souvent esmeu, bouillant, & furieux. Mais Dieu qui scayt les siens tousjours conduire Feit que pour lors rien ne nous y peut nuire. Le vent est frais en poupe qui nous meine: La mer bonasse attrempée, & sereine. Tant que passez noz sommes sans ennuys, Six cents mille oultre en trois jours, & trois nuictz. Ayans nagé paravant dix mil mille Sans entrer port, chasteau, terre, ne ville.