1645 1650 1655 1660 1665 1670 1675 1680

Le cueur qui est seul entier demouré Lequel j'ay veu, suyvi, & mesuré, A six vingtz piedz de long, & cent de large. Hault eslevé, tout rond, à double estage: Pavé de marbre uny, cler, & glissant, Le hault doré, en voulte fleschisant*,            V2, O: flegissant Sur double ranc de piliers asseuré: Piliers qui sont de Diaspre azuré Jaspe, & Porphyre estimez de grand somme. Longs, & massifs de deux brassees d'homme Sur chascun d'eulz soustenant la Masquee Une pierre est grande, & large plaquee De marbre gris, serpentin ou fauveau Pour decorer ce faix riche, & nouveau: / Toutes au mur de Brouze encousturees, D'antiquité, & de preis honorees. Le hault estage est aussi de piliers Environné, riches & singuliers: A ceulx d'en bas moindres en quantité, Mais en richesse egaulx, & dignité. Faisans autour une ronde ouverture, Ou l'on peult veoir de pres la couverture, De laquelle est la voulte magnifique, D'or marqueté à la vray Moysaïque: En divers lieux painte de beaux images, Dont les Turcs ont effacé les visages: Ne povans veoir, ny souffrir pourtraicture, De ce qui est produict par la Nature. Certes (amye) il fault que je confesse N'avoir jamais veu pareille richesse, Ny edifice estoffé de la sorte. Sortant duquel, de fonte la grand' porte Est de Porphyre excellent couronnee, Aux deux costez de columnes ouvree: Ayant pres soy cinq grandes autres portes De mesme fonte, espesses, & tant fortes, Que sans engins, & poulies subtiles A les serrer elles sont immobiles.     Droict au devant ceste eglise angelique S'estend en carre une place publique: