1685 1690 1695 1700 1705 1710 1715 1720

Ou l'oeil y peult trois grandeurs estimer, Le grand Palais, l'Eglise, & la grand ' Mer. Ce Palais est tresfort pour batterie, Tout à l'entour garny d'artillerie, / Sur l'avantmur qui le beau jardin cerne: Ou l'oeil de loing maintz beaux cypres discerne, Non apparens en ce lieu seulement, Mais de la ville en tous lieux, tellement Que l'on diroit à veoir celle cité Que c'est un parc de maisons habité: Rendant à l'oeil plaisante perspective. En ce Saray, maison recreative Deux grans portailz on vient à rencontrer: Et double court avant que d'y entrer. Aux portes sont pendus les arcs turquoys, Flesches, & dardz, cymeterres, carquoys. Car à nul d'eulx est licite, & permis Armes porter, sinon contre ennemis. La grande court que l'on trouve premiere, A recevoir chevaux est coustumiere Des courtisans, qui vont faire la court. En l'autre endroit de la seconde court, Ou du logis est la magnificence, Y sont Bachas qui donnent audience: Qui sont trois chefz, gouverneurs de l'Empire, A qui l'honneur, & la fortune aspire De grands proufitz, de grands dangers aussi, Si le Seigneur trouve en eulx aucun sy. Eulx eslevez aux autres apparens, Jugent proces, debatz, & differens, Non tous les jours, mais trois fois la septmaine, En celle court de peuple toute pleine, Les uns assis demeurent en silence: Autres debout sans aucune insolence. / Coustume à eulx autant ou plus louable Que moins elle est à la nostre semblable. Car la verrez dix mille genissaires, Qui du seigneur sont gardes ordinaire, Assiz en terre en croisant leurs genoulx, Ne faire tant de bruict que six de nous.