165 170 175 180 185 190 195 200

Adonc paroit la bossue Albanie, L'isle de Gente, & la Chassalonie, Isles qui sont par renommée anciennes / Et de long temps bonnes Veniciennes. Nous les laissons six mil pres à main droicte, Et au canal ou la Mer estroicte Prenons la volte, au long d'Esclavonie Droit à Corfou, ville forte, & munie De gens de guerre, armes, & chasteau fort, Ou le grand Turc en vain feit son effort Huict ou dix jours avant nostre arrivée. Nous là venus d'une amytié privée Dedans l[']esquif envoyons gens en terre, Tant pour scavoir nouvelles de la guerre, Que pour prendre air, & refraichissement. Mais il est vray que nouveau pensement Vient à ceulx là qui ont fresches nouvelles: Il nous fut dict, que les Turcquesques voilles Se retiroyent droit à Constantinoble: Et le seigneur par terre à Endrenople. Qui nous donna un grand contentement D'estre certains du prompt departement Que Turcs faisoyent hors la terre Chrestienne Car nous estions (quelque chose qu'on tienne) La envoyez pour un effect semblable: A tous Chrestiens utile & proufitable. Mais cognoissans l[']entreprinse rompue Le temps changé, la volunté nous mue Plus n'esperions r'avoir ceste saison, Ce qui est nostre à trop juste raison. Mais presumans qu'une année opportune Dieu au bon droict donra bonne fortune, / Nous concluons soubdain fresches eaux prendre, Et de trouver nostre armée entreprendre. Lors les ruraulx gouverneurs de la ville, Venitiens de condition vile, Userent bien de rusticité telle Qu'à Latona la deesse immortelle Feirent jadis les villains de Lycie: Dont ne resta leur offense impunie,