325 330 335 340 345 350 355 360

Il me suffit que vous ayez peu veoir La faulte en elle, & non en mon debvoir. Laquelle ayant mon heur ainsi deffaict, Scavez vous bien en apres qu'elle a faict ? Si tost qu'elle eust le lien empesché, Qui noz deux corps peult joindre sans peché, Et qu'elle eust terme ordonné de six moys, Pour reculer le bien que tant j'aymoys: Affin du tout m'en frustrer, & chasser, Elle me va à la court pourchasser (Soubz ombre d'estre un mien advancement) Nouvelle charge, & nouveau pensement: Me contraignant laisser maistre, & amye, Pour me soubmettre au danger de ma vie. Laquelle tost voulant la faulse estaindre, Aux bas enfers se despescha d'attaindre: Ou de la Mort s'acointa tellement,/ Qu'elle la feit venir secrettement, Cacher aux montz d'Albanie, à l'endroit Ou je debvois prendre mon chemin droict Par celle mer, qui bat les propres montz: Y pretendant me submerger aux fonds. Mais ce pendant que va elle inventer? Voyant des miens en ce monde rester Un seul amy, un mien prochain parent, Qui de long temps par service apparent, Avoit acquis honneur, bruit, & estime Envers son Prince, & pays legitime: Et promectoit par merites anciens, Une esperance heureuse à tous les siens: Elle le vous attire pas à pas, En l'Albanie, ou mort ne dormoit pas: Laquelle estant de frapper tresexperte, Feit de sa vie, à France, & à moy perte. De tel apast, la Mort affriandie, Court par le camp Turquesque à l'estourdie. Et vous transmet de foy mainte ame nue, Aux bas Enfers dont elle estoit venue. Puis espiant si point en Mer je nage, Y veult venir faire un nouveau mesnage: